Սիրելի հայրենակիցներ, աշխարհասփյուռ հայություն.
Այսօր Հայոց ցեղասպանության հիշատակի օրն է և մենք հարգանքի տուրք ենք մատուցում Առաջին աշխարհամարտի տարիներին ծրագրված և իրականացված հրեշավոր ոճրագործության մեր անմեղ զոհերին՝ խնկարկելով վերջիններիս հավերժ հիշատակն ու վերհիշելով նրանց տառապանքի ուղին:
Ցեղասպանության տարիներին մեր ժողովուրդը տեսավ մեկ և կես միլիոն իր զավակների սպանդը, իր ազգային-հոգևոր արժեքների, մեր գյուղերի ու քաղաքների ավերումը։ Մեր նահատակները, ահավոր տառապանքների միջով անցնելով, «մասնակից դարձան Քրիստոսի չարչարանքներին, կերպարանակից՝ Նրա մահվան, ժառանգակից Հարության» (հմմտ․ Փիլիպ. 3.10) և աննկուն մնալով հավատքի մեջ՝ անպարտելի եղան ոգով ու մահվանից հավիտենական կյանք փոխադրվեցին՝ արժանանալով սրբերի անթառամ լուսեպսակին։
Արդեն 109 տարի է անցել այն օրերից, երբ անապատներում քամին ոռնալով անթաղ աչքերի հայացքները փակում էր ավազով:
Տասնամյակներ շարունակ մեր ժողովուրդը միայնակ է կրել 20-րդ դարի իր մեծագույն ողբերգության խորը վիշտն ու հետամուտ եղել արդար իր դատի պաշտպանությանը: Այս օրերին աշխարհասփյուռ հայությունը՝ հոգու կսկիծով, իսկ առաջադեմ մարդկությունը՝ աղաղակող անարդարությունը չհանդուրժող կոչերով, հիշում ու դատապարտում են 20-րդ դարի առաջին ցեղասպանությունը, որ մարդկության կյանքում բացառվեն այդօրինակ ոճիրները։
Հաստատուն ու աննկուն մնանք խաղաղության Ավետարանի հույսին ու հիշատակի այս օրը խունկ և աղոթք մատուցենք վերստին, որ Տերը երկնային հավիտենության երանության մեջ պահի հոգիները Հայոց ցեղասպանության բյուրավոր զոհերի, ովքեր ողջ են մեզնով, խոսում են և չեն լռելու այնքան ժամանակ, մինչև ինչ մեռած է՝ կենդանանա, ինչ ողջակիզված է՝ ծաղկի…